नमस्कार वाचकहो,
मला बाळ होईल का? या लेखाचे २ भाग प्रकाशित केले त्यांना दिलेल्या प्रतिसादाबद्दल आपले मनःपूर्वक धन्यवाद. हे लेख प्रकाशित केल्यानंतर मला अनेक जणांनी संपर्क केला. त्यांनी जे प्रश्न विचारले त्या प्रश्नांची उत्तरे येथे देण्याचा प्रयत्न करतो.. मुळात संतती सौख्य हा विषय तसा खूप विस्तृत आहे. बऱ्याच जणांनी फक्त लग्न कुंडली आधारे संतती संबंधी प्रश्न विचारले, इथे एक नमूद करावेसे वाटते कि ज्योतिष शास्त्रांतर्गत विचारला गेलेला कुठलाही प्रश्न हा केवळ जन्म लग्न कुंडली वरून सोडवता येत नाही. तसे कोणी करत असेल तर त्या ज्योतिर्विदांना स्पष्टपणे विचारावे आपण ज्योतिष कुठे शिकलात? असो. संतती संबंधी कोणताही प्रश्न पाहण्यासाठी जन्म लग्न कुंडलीतील पंचम स्थान, पंचम स्थानातील ग्रह, त्या ग्रहांची राशिगत, नक्षत्रगत, नवांशगत (यासाठी नवमांश कुंडलीचा अभ्यास करावा लागतो.) स्थिती असेच त्या ग्रहांची जन्म लग्न कुंडलीतील इतर ग्रहांबरोबर झालेले शुभ अशुभ योग तसेच पंचम स्थानावर असलेली इतर ग्रहांची दृष्टी या गोष्टी अभ्यासाव्या लागतात. त्याचबरोबर पंचमेशाची स्थितीही वरील प्रमाणे अभासावी लागते. त्याचबरोबर तत्कालीन महादशा, अंतर्दशा व गोचर याचाही अभ्यास करावा लागतो, पुन्हा कृष्णमुर्ती पद्धती प्रमाणे अभ्यास करावयाचा तर ती एक आणखी वेगळी प्रोसेस आहे. पंचम स्थानाचा सब कसा कार्येश झाला आहे ते पाहणे. तत्कालीन महादशा अंतर्दशा स्वामी कसे कार्येश झाले आहेत ते पाहणे. हे असे सखोल विश्लेषण करून मगच फलादेश देता येतो. संतती होईल का? संतती सौख्य देईल का? संतती योग कधी आहेत? संतती होत नसल्यास त्याची शास्त्रीय करणे काय आहेत? त्यासाठी काय उपाय योजना कराव्यात? पितृदोष, सर्पदोष, वास्तुदोष, इ कारणामुळे संतती प्राप्तीत अडथळे येतात. बरे उपायहि काय करावेत ते प्रत्येक कुंडलीप्रमाणे भिन्न असतात. एकच उपाय सरसकट सर्वांनाच फलदायक होत नाही. समजा मंत्रोपासना करायची असेल तर ती व्यक्तीच्या जन्म लग्न, राशी, नक्षत्राप्रमाणे बदलते. संतती प्राप्ती करिता गुरुचरीत्राचा ३९ वा अध्याय पठण करण्याचा सल्ला दिला जातो, पण सर्वांनाच त्याचा फायदा होणार नाही. कारण प्रत्येक व्यक्तीच्या कुंडली प्रमाणे त्याचे आराध्य वेगवेगळे असते. आपल्या हिंदू धर्म संस्कृती प्रमाणे सर्व दैवत जसे, श्रीराम, हनुमान, देवी, दत्त, श्री गणेश, श्री कृष्ण इ संतती प्राप्ती करिता कृपा करण्यास सक्षम आहेत, पण प्रत्येकाचे पूर्वसुकृत वेगळे, पुण्य पाप व कर्म वेगळे. बऱ्याचदा ज्योतीर्विदाची स्वतःची व्यक्तिगत साधना असते त्याचाही जाताकाला उपयोग होतोच म्हणून तज्ञ ज्योतीर्विदाच्या सल्ल्यानुसार योग्य तो उपाय व उपासना आवर्जून विश्वास, श्रद्धा व निष्ठेने करावी. जाता जाता, संतती संबंधी प्रश्न करिता पती पत्नी दोघांच्या कुंडलीचा अभ्यास करावा.
शुभम भवतु!!
