ज्योतिष लेख : मला बाळ होईल का? - भाग १

मानवी जीवनात संततीचे महत्व हे अबाधित असतं. लग्न होऊन फार फार तर २ -३ वर्षांनी सुद्धा मुल होत नसेल तर मात्र सतत एक प्रकारची चिंता काळीज पोखरत राहते. खासकरून एखाद्या महिलेसाठी तर अत्यंत कष्टदायक प्रसंगाला सामोरे जावे लागत. बर बऱ्याचदा असेहो होते कि गर्भ राहतो पण काही वैद्यकीय कारणामुळे गर्भपात करावा लागतो किंवा नैसर्गिकपणे होतो. वारंवार गर्भपात होतो. अशी अनेक दुःखी कष्टी जोडपी आहेत. याची कारण पती पत्नीच्या कुंडलीत निश्चितपणे सापडतात. अशाच पती पत्नीच्या कुंडलीचा आढावा आपण घेणार आहोत. या कुंडलीचे विश्लेषण २ पद्धतीने केले आहे. पारंपारिक व कृष्णमुर्ती पद्धती. संतती संबधी प्रश्न असल्यास फक्त पतीची किंवा पत्नीची कुंडली न पाहता दोघांच्याही पत्रिकेचे एकत्रित विश्लेषण करावे आणि मगच फलादेश द्यावा हे माझं स्पष्ट मत आहे.

गोपनीयतेच्या कारणास्तव जातकाचे नाव येथे नमूद करणे अप्रस्तुत ठरेल म्हणून फक्त जन्म लग्न, नवमांश व कृष्णमुर्ती पद्धतीचे तपशिलच येथे दिले आहेत.

पत्नी : 

                    जन्म लग्न कुंडली                                                    नवमांश कुंडली 

               

संतती संबंधी कुंडलीचे विश्लेषण करताना प्रामुख्याने पंचम स्थान, पंचम स्थानाचा अधिपती  म्हणजेच पंचमेश. संतती कारक गुरु, तत्कालीन महादशा व अंतर्दशा स्वामी  तसेच पंचम स्थानातील ग्रह विचारात घ्यावेत. कृष्णमुर्ती पद्धतीनुसार पंचम स्थानाचा उपनक्षत्रस्वामी कसा कार्येश झाला आहे ते विचारात घ्यावे. 

सदर महिलेच्या जन्म लग्न कुंडलीत पंचम स्थानात मकर राशीत शुक्र, राहू,  शनी व रवी हे ग्रह आहेत. शुक्र  मंगळाच्या धनिष्ठा नक्षत्रात सिंह नवांशात बाल अवस्थेत आहे.  आता आपण शुक्राचा विचार करू. स्त्रियांच्या कुंडलीत बीजांड, गर्भाशय इ प्रजनन संबंधित अवयव हे शुक्राच्या कारकत्वात येतात. बाल्य अवस्थेमुळे शुक्रासारख्या शुभ ग्रहाचे शुभ परिणाम अत्यंत नगण्य मिळतात थोडक्यात शुक्र बळ नाही. पंचम स्थानातील राहू मकर राशीत, उत्तराषाढा या रवीच्या नक्षत्रात कुंभ नवांशात आहे. हा एक अतिशय अशुभ योग होतो. पंचम स्थानातील राहू सर्पदोष दर्शवतो. सर्प दोषामुळे होणारी संतती जगत नाही.  एक समाधानाची बाब अशी कि हा राहू मृत अवस्थेत असल्यामुळे जातकाचे तितके मोठे नुकसान करत नाही पण अशुभ परिणाम जाणवतात हे खरे. पंचमातील शुक्र, राहू बरोबरच शनी देखील स्वराशीत असला तरी राहू व रवीच्या अंशात्मक युतीत आहे. शनी हा विलंबाचा कारक ग्रह आहे. ज्या स्थानात असेल त्या स्थ्नाच्या कारक फलात विलंब व अडथळे निर्माण करतो. दुर्दैवाची गोष्ट हि कि राहू बरोबर अंशात्मक युती मुळे शापित योग निर्माण होतो. कुंडलीत शनी राहु युती कुठल्याही स्थानात होत असल्यास त्याला प्रेत शाप योग मानला जातो. ज्या स्थानात हा योग असतो त्या स्थानाच्या कारकत्वाची अशुभ फले तीव्रतेने मिळतात. पंचमात शनी राहू युती असता संतती होत नाही. झालीच तर जगत नाही. जगलीच तर दुःखास कारणीभूत होते. मकर राशी कुंभ नावांशातील शनी राहू युतीमुळे बिघडला. पंचम स्थानातील मकर राशीतील रवी मुळातच शत्रू राशीत असल्यामुळे अशुभ फळात वृद्धी करतो त्याच बरोबर तो राहू बरोबर अंशात्मक युतित असल्यामुळे प्रखर असा पितृदोष निर्माण होतो. त्याचबरोबर मकर राशिस्थ रवी कुंभ या बलहीन नवमांशी असल्याने अतिशय तीव्र अशुभयोग निर्माण होतो. आता पंचमेशहि शनीच आहे. संतती कारक गुरु हा जन्म लग्न कुंडलीत कर्क राशीत लाभ स्थानात वृश्चिक नवांशात आहे. गुरु युवावस्थेत वक्री आहे. हि एक जमेची बाजू झाली. कारण लाभातला गुरु पंचम स्थानाची शुभ फले देतो, परंतु हा गुरु केतू बरोबर स्थानगत युतीत आहे, शिवाय शनी, राहू, रवीच्या सप्तम दृष्टीत असल्याने अशुभ योग निर्माण होतो. 

कृष्णमुर्ती पद्धतीप्रमाणे, पंचम स्थानाचा उपनक्षत्रस्वामी हा चंद्र असून तो ४, ६, व ११ स्थानचा कार्येश होतो. चंद्र राहूच्या नक्षत्रात असून राहू ४, ५, १२ य स्थानाचा कार्येश होतो. चंद्राचा उपनक्षत्रस्वामी सूर्य देखील ४ व १२ स्थानाचा कार्येश होतो. रवीचा नक्षत्रस्वामी रविच आहे म्हणून त्याचा उपनक्षत्रस्वामी बुध हा १०, ४ व १ स्थानाचा कार्येश होतो. तसे पहिले असता हे सर्व ग्रह चतुर्थ स्थानाचे बलवान कार्येश होतात. म्हणजे पंचमाच्या व्यय स्थानाचे कार्येश होतात सबब संतती प्राप्तीच्या दृष्टीने अत्यंत प्रतिकूल. सध्या महादशा स्वामीसुद्धा शनीच आहे. अशा या प्रतिकूल ग्राहमानामुळे या माउलीचे दुर्दैवाने ४ वेळा गर्भपात झाले. दशास्वामी शनी व अंतर्दशा स्वामी शुक्र, रवी, बुध व केतू हे पंचम स्थानाचे कार्येश असल्याने त्या त्या दशा अंतर्दशेत गर्भ राहिला पण ..... दुर्दैव आड आलेच. उपाय म्हणून या माउलीने प्रेताशाप दोष, पितृ दोष, केतू गुरु चांडाळ दोष व सर्प दोष या अशुभ योगांची शांती कर्म करून घ्यावीत व गं गणपतये नमः या मंत्राचा जास्तीत जास्त जप करावा. संतती योग आहेतच शिवाय खडतर उपासनेमुळे प्रारब्धयोग निश्चितच सौम्य होतात. आता पतीच्या कुंडलीचे विश्लेषण आपण दुसऱ्या भागात करू. 

||शुभम भवतु||